نص شهادة والدة عصام عطا وهي السيدة / إنعام حسن محمد في المحضر رقم 5537 لسنة 2011 اداري مصر القديمة
وكيل النيابة : إيه اللي حصل ؟
أم عصام : اللي حصل إن ابني عصام علي عطا كان اتقبض عليه بتاريخ 25/2/2011 بتهمة الاستيلاء على مسكن بحي المقطم، وبتاريخ 26/2 اتحكم عليه بسنتين سجن حكم عسكري، وبعد كده عرفت إنه راح سجن الاستئناف وقعد هناك 3 شهور وبعد كده راح سجن طره شديد الحراسة وكنت بروح أزوره كل 15 يوم، وبقالي حوالي 3 شهور مازورتش ابني، ولما رحت أزوره يوم الثلاثاء الموافق 25/10/2011 كانت معايا واحدة جارتنا اسمها آيه، وبنتي الصغيرة اسمها سلمى وكان معايا شنط كتير وكانوا بيشيلوا معايا، ولما دخلنا قابلنا عصام كان اقعد معاناه مسجون تاني معرفش اسمه ايه، وكان فيه واحد بيعمل شاي وهو مسجون وعرفت من عصام إنه له عنده 5 جنيه وطلب منه إنه يعملنا شاي وابني شد معاه في الكلام وقال إنه هيتصافى معاه لما يدخل جوه، وأنا قلتله سيب الخمسة جنيه زكا عنك، واديتوه شريحة بتاعت محمول كان طلبها مني كنت شايلاها مع آيه، ولما إديناله الشريحة هو اداها للمسجون التاني اللي كان موجود علشان هو أقدم من ابني، وساعتها المسجون اللي بيعمل الشاي شاف ابني وهو بيدي الشريحة لزميله وراح بلغ بتوع المباحث اللي راحوا لظابط اسمه \”نور\” وبلغوه باللي حصل وطلب إنه ينهي الزيارة ،طلعونا بره وسمعت عصام بيقول إلحقيني يا اما، ساعتها طلعونا بره وجيت أشوفه من الشبابيك السلك، قاموا حطوا بطاطين وداروا علينا واستنينا لحد العصر إنه نعرف حاجة عن ابني، وبعدها روحت وحاولت أتصل بيه على تليفون كان ابني بيكلمني منه قبل ما أديله الشريحة لاقيته مقفول لحد ما بعد ساعة التليفون اتفتح، وعرفت من مسجون تاني إن ابني حطوله خرطوم في فتحة الشرج وشربوه حوالي اتنين لتر ميه فيهم مسحوق غسيل، وبعد أربع ساعات لاقيت ابني بيكلمني من الخط القديم اللي جوه السجن وحكالي إن الظابط \”نور\” بيعذبه وانه حطله خرطوم في فتحة الشرج وشربه حوالي 2 لتر ميه بمسحوق وساعتها قفل معايا وكلمني الساعة 11 بالليل وطلب إني أشحنله رصيد على الخط اللي أنا إديتهوله عشان كان عايز يتكلم مع أبوه واخواته،و فعلا طلعت شحنتله كارت بعشرة وكلمته أتاكد إن الرصيد وصل، ولما روحت هو اتصل بأبوه وطلب منه إنه يقدم شكوى للنائب العام بسبب التعذيب اللي حصل معاه من الظابط \”نور حسن\” ،وساعتها محمد أخوه كلمه وشدوا مع بعض في التليفون وقاله إنه لو قدم شكوى هيتعذب زيادة على كده وقفل معانا.
كلمني تاني يوم الأربع 26/10 الساعة 11 وسأل عليا وطلب مني تاني أشحنله كارت بعشرة، وفعلا شحنتله كارت بعشرة واتأكدت إننه وصل، واتقطعت ما بينا وبينه الاتصالات بعدها.
لحد يوم الخميس الساعة 4 العصر كلمتني جارتنا اسمها فايزة من عابدين، وقالتلي إن عصام تعبان في المستشفى وطلبت مني اننا نروحله في ساعتها، وبعدها مباشرة آيه اتصلت بيا وطلبت مني إني أقابلها في السيدة عايشة عشان عرفت إن ابني تعبان وبيموت، وفعلا لفيت معاها على مستشفيات كتير لحد لما رحت القصر العيني وعرفت إن ابني في مركز السموم، ولما رحت مركز السموم عرفت إن ابني اتوفى وموجود في الثلاجة، ولما دخلت التلاجة لقيت وشه وارم ومناخيره لونها أزرق وعلى بقه في رغاوي مختلطة بالدم وبطنه منفوخة وجسمه كله وارم.
وهو ده كل اللي حصل.
س : منذ متى وابنك المجني عليه عصام علي عطا مقيد الحرية ؟
ج :ابني مقبوض عليه من يوم 25/2/2011.
س : وما هي طبيعة التهمة الموجهه إليه المقيد الحرية عليها ؟
ج : هو مقيد الحرية على ذمة قضية إستيلاء على مسكن.
س : وما هي المدة المقضي بها في الحكم عليه ؟
ج : هو مسجون سنتين.
س : ومتى صدر الحكم تحديدا ؟
ج : أنا عرفت يوم 26/2/ 2011 إنه اتحكم عليه عسكريا بسنتين مع النفاذ.
س : وما الذي حدث عقب صدور الحكم بالحبس ضد نجلك المجني عليه ؟
ج : هو تم ترحيله على سجن الاستئناف وتم نقله بعد كده على سجن طره شديد الحراسة.
س : وكم عدد المرات التي قمت فيها بزيارة نجلك أثناء تواجده بالسجن ؟
ج : وهو موجود بسجن الاستئناف كنت بروحله كل أسبوع لحد لما تم نقله لسجن طره.
س :وهل قمت بزيارته حال تواجده بسجن طره شديد الحراسة ؟
ج : أنا كنت بروحله كل أسبوعين بس انقطعت عن الزيارة من حوالي 3 شهور.
س : وماسبب ذلك الانقطاع ؟
ج : بسبب الظروف المادية.
س : وما الذي حدث بعد ذلك ؟
ج: بعد انقطاعي حوالي 3 شهور، أول مرة أروحلوه بعدها كان يوم التلات الموافق 25/10/.2011
س: ومن كان برفقتك آنذاك ؟
ج: كانت معايا واحدة جارتنا اسمها آيه وبنتي الصغيرة اسمها سلمى ودي لسه في ابتدائي وكان معانا زيارة واخدينها لعصام.
س : وما الذي كانت تحويه الزيارة والتي كانت من المفترض تسليمها للمجني عليه ؟
ج: أنا كان معايا ست شنط عبارة عن مكرونة وفول وسكر وشاي ورز وفاكهه وبطانية وملايه وبعض الملابس، ده غير إنه كان طالب مني خط اتصالات علشان يبقى معاه جوه السجن وده أنا كنت شيلاه مع آيه عشان تديهلوه في الزيارة.
س : وهل توجهتي لزيارة نجلك المجني عليه صباح يوم 25/10/2011 ؟
ج: أيوه
س : ومتى تحديدا وصلتي إلى سجن طره ؟
ج : أنا وصلت الساعة 8 ص وعلى ما دخلت أشوف عصام كانت الساعة 12 الضهر.
س : وما هي الإجراءات المتبعة أثناء دخولك بداخل السجن من ناحية التفتيش الخاص بالزائرين وما بحوذتهم ؟
ج : هما في البداية بيفتشونا على الباب الرئيسي وبيحطوا الحاجات اللي معانا على جهاز عشان يشوفوا اذا كان فيها ممنوعات ولا لأ، وبعد كده بيدخلونا في أوضة جوه وبيفتشونا بمعرفة واحدة ست، وبعد كده بنقطع تذكرة للزيارة وبتاخد الزيارة وندخل جوه وواحدة بتفتشلنا الزيارة كلها لحد ما بيندهوا علينا عشان الزيارة.
س : وهل تم اتباع كافة تلك الاجراءات في شأن التفتيش ؟
ج : أيوه.
س : وما الذي حدث عقب تفتيشك وتفتيش ما كان بحوزتك ؟
ج : دخلنا على الزيارة في أوضة كبيرة وقعدنا على الأرض لأن ابني كان فارش على الأرض.
س : ومن كان متواجد آنذاك في الزيارة ؟
ج : كان موجود ابني عصام وكنت موجودة أنا وأيه وسلمى وكان في واحد مسجون تاني قاعد معاه أهله بيزوروه وواحد مسجون تالت ده كان بيعمل شاي ده غير بتوع الشرطة اللي كانوا موجودين أثناء الزيارة.
س : وما هي الحالة التي كان عليها نجلك حال مشاهدتك له آنذاك ؟
ج : هو كان وشه وارم ساعتها.
س : وهل وقفتي على سبب ذلك آنذاك ؟
ج : أيوه.
س : وما الذي كان سبب ذلك ؟
ج : هو قالي إنه مضروب من الظابط \”نور حسن\”
س : وهل وقفتي على سبب تعدي نور حسن عليه بذلك ؟
ج : لا ، وهو ماقاليش ليه.
س : وهل من ثمة إصابات شاهدتيها بنجلك آنذاك ؟
ج : هو مكنش فيه غير وشه اللي كان وارم.
س : وما الذي حدث في تلك الزيارة ؟
ج : أثناء الزيارة أنا عرفت إنه ليه خمسة جنية عند المسجون اللي بيعمل شاي في الزيارة وطلبها منه ورفض يديهاله وقاله لما نبقى ندخل جوه وانا قلتله سيبها زكا عنك وآيه اديتله شريحة التليفون اللي كان طلبها مني.
س : وما هو رقم تلك الشريحة والتي قمت بتسليمها والمدعوة آيه ؟
ج : أنا إديتله شريحة رقمها 01555164916
\”ملحوظة من النيابة: قدمت لنا الحاضرة علبة كرتونية خاصة بشرائح الهواتف المحمولة مدون عليها ذات الرقم والتي قررت تسليمها بيدها للقتيل قبل وفاته.\”
س : وما الذي حدث قبل تسليم نجلك الشريحة ؟
ج : آيه هي اللي إدت الشريحة لابني وأخدها منها وإداها للمسجون التاني واللي كان موجود في نفس الزيارة ساعتها.
س : وما سبب قيام نجلك بإعطاء تلك الشريحة لذلك المسجون ؟
ج : عشان المسجون التاني قديم عن ابني وعشان هو هيدخلها.
س : وهل هناك معلومات تصل إلى أسماء هؤلاء المساجين ؟
ج : لا.
س : وما الذي حدث عقب ذلك ؟
ج : لما ابني إدى الشريحة لزميله المسجون، زميلهم التالت اللي كان بيعمل شاي شافه وبلغ بتوع المباحث اللي راحوا قالوا لنور ان ابني بيبلع حاجة وده مش صحيح وساعتها \”نور\” قالهم ينهوا الزيارة وخلونا نخرج بره وهما بيقفلوا الباب سمعت ابني وهو بيصرخ وبيقول الحقيني يا اماه.
س : وما الذي تنامى الي سمعك تحديدا آنذاك ؟
ج : أنا سمعته وهو بيصرخ و بيقول الحقيني يا اماه.
س : وما التصرف الذي بدر منك حال سماعك لاستغاثة نجلك آنذاك ؟
ج : أنا لفيت عشان أشوفه من الشبابيك السلك بس هما كانوا حطوا البطاطين والكفرتات اللي كنا قاعدين عليها عشان منشوفش حاجة.
س : وهل وقفتي على سبب تلك الاستغاثة من نجلك آنذاك ؟
ج : لا أنا معرفش هو بيصرخ ليه.
س : وإلى أين اتجهتي عقب ذلك ؟
ج : بعدها أنا روحت وفضلت أتصل على الرقم اللي كان بيكلمني منه والرقم ده غير الرقم الجديد اللي أنا إديتهوله في الزيارة.
س : وما هو رقم ذلك الهاتف المحمول والذي حاولت الاتصال به ؟
ج : أنا معرفش الرقم بالظبط ولكن الرقم ده مع آيه.
س : وهل اعتاد نجلك المجني عليه مهاتفتك من خلال ذلك الهاتف المحمول ؟
ج : أثناء ما كان محبوس في سجن طره كان على طول بيكلمني من الرقم اللي تعرفه آيه لحد لما اشترتله خط جديد.
س: وما الذي حدث عقب انصرافك من زيارة نجلك ؟
ج : بعد ما روحت وكنت بحاول أتصل بيه والتليفونات مقفولة بعدها واحنا ماشيين في الطريق آيه اتصلت على التليفون اللي كان عصام بيكلمنا منه ورد عليها واحد وقالها إن عصام دخل التأديب وقالها إنهم حطوله خرطوم في فتحة الشرج وشربوه ميه بإريال.
س : وما التصرف الذي بدر منك عقب مجراء ذلك الاتصال الهاتفي من قبل من تدعى آيه والذي علمت من خلاله بما حدث لابنك المجني عليه ؟
ج : أنا بدأت أصرخ وبعدها بأربع ساعات ابني اتصل بيا من نفس التليفون القديم وبلغني اللي حصل معاه وطلب مني إني ما ابلغش والده.
س : وما الذي أبلغك به نجلك المجني عليه آنذاك ؟
ج : هو قالي إن هما دخلوه التأديب وإنهم حطوله خرطوم في فتحة الشرج وشربوه حوالي 2 لتر ميه بإريال وأخدوا منه الزيارة لولا زمايله في السجن، دخلوا للظابط \”نور\” وقالوله إنه ما بيشربش حاجة وملوش في أي حاجة عشان كده هو خرج من التأديب بس قالي إنه تعبان.
س : وهل قرر لك نجلك أسباب ذلك الإعياء آنذاك ؟
ج : هو قالي إنه انضرب واتبهدل وحكالي على موضوع خرطوم الميه وطلب مني إني ما ابلغش ابوه وإني اشتكي الظابط \”نور\”
س : وما هي الفترة الزمنية التي استغرقتها تلك المكالمة الهاتفية ؟
ج : هي ماتزيدش عن نص ساعة وتزيد عن ربع ساعة.
س : وهل كانت تلك المكالمة الهاتفية من الهاتف المحمول أو الشريحة التي قمتي بتسليمها له في الزيارة ؟
ج : لا ، دي كانت من التليفون القديم اللي كان جوه السجن.
س : وما الذي حدث عقب ذلك ؟
ج : في نفس اليوم اللي هو الثلاثاء 25/10/2011 عصام اتصل بيه تاني حوالي الساعة 11 بالليل من نفس الرقم القديم وطلب مني إني أشحلنه الرقم الجديد عشان عايز يكلمنا منه وبالفعل انا شحنتله كارت بعشرة.
س : ومتى تحديدا حدثت أول مكالمة هاتفية من شريحة الهاتف المحمول والتي قمتي بتسليمها لنجلك في الزيارة والتي قررت سلفا بالتحقيقات أنها تحمل رقم 01555164916 ؟
ج : بعد ما شحنتله كارت بعشرة راح متصل بيا بعد الساعة 11 بالليل.
س : وعلى أي هاتف محمول قام المجني عليه بمهاتفتك ؟
ج : مش فاكرة.
س : وما الذي حدث وفحوى الحوار بتلك المكالمة الهاتفية ؟
ج : هو كلمني وطلب إنه يتكلم مع والده وفعلا كلم والده وكان عايز أبوه يروح يشتكي \”نور حسن\” للنائب العام بس أخوه محمد كلمه ساعتها وشد معاه في الكلام وقال إنه لو قدم شكوى هو هيتعذب زيادة.
س : وهل تلك المكالمة الهاتفية هي أول مكالمة يقوم بها المجني عليه من الهاتف المحمول ؟
ج : أيوه.
س : وما هي الفترة الزمنية التي استغرقتها تلك المكالمة ؟
ج : حوالي ربع ساعة.
س : وما الذي حدث عقب تلك المكالمة الهاتفية ؟
ج : بعد ما عصام كلمنا وكلم أبوه وأخوه انقطعت بينا وبينه الاتصالات لحد يوم الأربعاء 26/10/2011 كلمنا حوالي الساعة 11 بالليل.
س : وما هو مضمون تلك المكالمة الهاتفية ؟
ج : هو طلب مني إني أشحنله كارت تاني بعشرة جنية وفعلا شحنتهوله وقالي أنا هتصل بيكوا .
س : وهل قام بذلك ؟
ج : اأوه هو اتصل لما روحت وكلم أبوه وسأله اذا كان قدم شكوى في \”نور\” ولا لأ وأبوه قاله إنه هيقدمها ومحمد أخوه كلمه وشد في الكلام تاني معاه وقاله خليك راجل عشان لو اتقدمت شكوى انت هتتأذي، وبعدها قفل وعرفت من بناتي الاتنين بعدها إنه اتصل بيهم وكلم كل واحدة عشان يطمن عليها وبعد المكالمة دي أنا معرفتش أي حاجة لحد لما عرفت إن هو في المستشفى.
س : وكيف نمى إلى علمك بكون نجلك متواجدا بإحدى المستشفيات ؟
ج : يوم الأربعاء لما كلمني قالي إنه تعبان ويوم الخميس الساعة حوالي 4 العصر اتصلت بيا واحدة اسمها فايزة من عابدين وقالتلي ان ابنك تعبان قوي في المستشفى وبعدها مباشرة كلمتني آيه وطلبت مني إني أقابلها في السيدة عايشة عشان نشوف عصام.
س : وكيف نمى الي علم من تدعى فايزة بكون ابنك مريض ؟
ج : فايزة عرفت من بنتي الكبيرة اسمها ياسمين لأن في واحد اتصل بياسمين وقالها إن عصام تعبان .
س : وما هو الاسم الثلاثي لفايزة ؟
ج: فايزة ده اسم الشهرة والاسم الرسمي ليها زينب أحمد خليل ومقيمة ب 4 حارة عبد الدايم عابدين.
س : وكيف نمى إلى علم آيه إن عصام تعبان ؟
ج : معرفش .
س : وما هو التصرف الذي بدر منك عقب علمك أن ابنك مريض ؟
ج : روحت مركز السموم وهناك مكنش حد راضي يديني معلومات ولحد ما عرفت إن ابني اتوفى وموجود في التلاجة وساعتها كان أبوه واخواته جم ودخلت أنا وأبوه التلاجة بالعافية عشان نشوف عصام.
س : وما هي الحالة التي شاهدت عليها نجلك المتوفي ؟
ج : أنا لقيته نايم ووشه وارم ومتغطي ببطانية ومناخيره زرقا وبتنزف دم وجاكت الترنج متقطع وجسمه كله وارم وكان في رغاوي على بقه من المسحوق اللي كان شربه مختلطة بالدم .
س : وما الذي حدث عقب ذلك ؟
ج : وبعدها طلعنا من التلاجة ولحد ما ابني راح المشرحة وهو ده كل اللي حصل.
س : هل كان ابنك المجني عليه يتعاطى ما يسمى مخدرات ؟
ج : لا .
س : هل كان يعاني من ثمة أمراض نفسية أو عصبية ؟
ج : لا .
س : هل كان نجلك المتوفي يتناول ثمة أدوية أوعقاقير مؤثرة على الصحة النفسية او العصبية ؟
ج : لا .
س : وما هي عدد المرات التي قام بها نجلك المتوفي بمهاتفك من الرقم الجديد ؟
ج : مرتين اتنين بس.
س : وعلى أي هاتف محمول كان يهاتفك ؟
ج : مش فاكرة.
س : وما هي عدد المرات التي قام بمكالمة والده ؟
ج : هو كلم أبوه مرتين من نفس الرقم.
س : وما هو سبب قيام \”نور حسن\” بالتعدي على نجلك بإتيان ما أتاه من أفعال على سابق ما قررت ؟
ج : معرفش.
س : وما هي الأفعال المادية التي أوتيت تجاه نجلك تحديدا ؟
ج : هما ضربوه وعذبوه ده غير إن هما حطوله خرطوم في فتحة الشرج ده غير ال 2 لتر ميه بالمسحوق اللي شربوهاله.
س : ومن قام تحديدا إاتيان تلك الأفعال ؟
ج : الظابط \”نور حسن\” ومعاه تلاتة مباحث.
س : وهل نمى إلى علمك أسماء الثلاثة اللي كانوا في رفقة \”نور حسن\” ؟
ج : لا .
س: وكيف نمى إلى علمك بوجود ثلاثة أفراد من قوة المباحث برفقة \”نور حسن\” ؟
ج : ابني اللي قالي إنهم التلاته اللي كانوا موجودين بالزيارة وطردوني بره.
س : وما قصد الظابط \”نور حسن\” والثلاثة اللي موجودين معاه ؟
ج : معرفش.
س : وما قولك فيما قرره كلا من:
– أحمد السيد أحمد عبد الرحمن
– أحمد السيد أحمد صديق
– محمد علي السيد أحمد
– سيد أحمد عثمان محمد
-سيد محمد اإباهيم رزق
بأنهم قد أبصروا نجلك المتوفي وهو في حالة إعياء شديد وبسؤاله عما أصابه قرر لهم أنه تناول طعام فاسد.
ج : الكلام ده محصلش .
س : وما قولك فيما أضافه وعقب مشاهدة نجلك على تلك الحالة فإنه قد تم عرضه على طبيب مستشفى السجن والذي قام بمحاولة اسعافه الي أن تم عودته إلى محبسه ؟
ج : الكلام ده محصلش .
س : ما قولك فيما قرره المسجون
– أحمد السيد أحمد صديق
من أنه وعقب عودة نجلك من توقيع الكشف الطبي عليه قرر له بقيامه بتناول أقراص وعقاقير ومواد مخدرة أثناء الزيارة الخاصة به ؟
ج : الكلام ده محصلش ، وده كدب لأني اتفتشت بالزيارة.
س : وما تعليلك لما قرره سالف الذكر ؟
ج : هما قالوا كده بسبب أنه تم تهديدهم من قبل الظابط \”نور\”.
س : وما هي علاقتك بالظابط \”نور حسن\” ؟
ج : أنا معرفوش وما شفتوش ومفيش بيني وبينه أي حاجة.
س : وما قولك بما قرره نجلك محمد على عطا سلفا بالتحقيقات من أن الهاتف المحمول الذي قمتي بإدخال شريحته يحمل رقم 01155164916 في حين تقديم علبة كارتونية الخاصة بالشريحة والتي تفيد ان الرقم هو 01555164916 فما تعليقك .؟
ج : الرقم اللي أنا دخلته لابني واللي أنا قدمته في العلبة الكرتونية في التحقيق.
س : بما تتهمي الظابط \”نور حسن\” ؟
ج : أنا بتهمه بموت ابني.
س : هل لديك اقوال اخرى ؟
ج : لا
ملحوظة : المحامين الحاضرين طلبوا استعجال تقرير الطب الشرعي مع تمكيننا من حضور طبيب مستقل في اعداد التقرير ، وتمكيننا من استخراج صورة من محاضر التحقيقات ، والحضور مع باقي الشهود سواء من داخل السجن او خارجه
